رسالة ود وترحيب

من قلب الحلم
حلم نثر مصر
احب ارحب بكل اللى عايز يشاركنا
وقلوبنا مفتوحه للجميع
شاركنا بافكارك
بكتاباتك
باحلامك

وفى النهايه بنتمنى تقضوا معانا وقت ممتع ومفيد

مدونة نثر مصر
دعوه للامل
دعوه للتفاؤل
دعوه للتغير
دعوه للتجديد
دعوه للحلم اللى جاى
تيجوا نحلم ببكره0000

مع خالص تحياتى وتقديرى

neveen_elhelaly

مجموعة أعمال من ديوان حلم على الخريطه

ديوان حلم على الخريطه هوه ديوانى التانى بعد الديوان الأول المنشور فى الثقافه الجماهيريه تحت عنوان (مأساة طالب جامعى ) أتمنى إن القصايد اللى هتقروها
دلوقت تعجبكم ..


بتجيلي رؤيا بإنى هموت ..
هموت .. رغم الأغانى و معزوفات باخ و موسيقى خيرت و ألحان محمد نوح ..
هموت .. غصب عنى و عن ذاتى الشرير و الطيب و عن عيني و دمعتها اللى بتهرب منى تسد فرااااغ الريح ..
غصب عن كفى اللى ما هانش عليا أمده في باطل أو آخد بيه قرش ما أستحقوش ..
غصب عن روحى اللى هاجت منى على غفله ففهمت أنا ليه إتولدت آخر العنقود و كنت أشقى من إخواتى كلهم ..
همــــــــــوت ..
في ليل شتا و محدش هيزعق عليا و لا حد هيبنى على قبرى زار الولى العارف بالله ..
في نن روح البنت اللى خدت منى حته و سمعتنى بأصرخ بإسمها رغم كل كائنات الكون بحاله ..
همــــــــــوت ..
و هتعيش الأغانى و الأحلام و الحب ..
و الوجــــــــــــــود .






· من تاني في نفس الحته بنتقابل ..
أنا و اللعنه و طعم السجاير المشبوهه ..
صدمه ..
كنت عايز أصدم نفسي و ما عرفتش ..
قربت أستشهد في الصيف
و الحرب في كل مكان شغاله
و أنا ..
من تاني بعدي من فوق خطوط النار و عيوني ترغرغ م الذل الأبدي و معني الأزمه..
نتقابل أنا و أصحابي
نتعامل في قزايز بيضا و دفيانه
و نشيش على أعظم قهوه في البلد ..
يصحى من تاني جوايا الوجع و أقلق قوي ..
من كل حاجه في بر النيل ..
و أسهر زي ما كنت بسهر زمان ..
عشان أحارب ..
و أستشهد ..
و أتقابل مع كل الناس .. ..
أغسطس 2004







· لسه زي ما أنا ..
بحلم في عمدان الخط و محطة الميترو
و المكتبه اللى واخده نص بيتي بالظبط ..
البنت مش بس حبيبتي و حكايتي مش آخر المنتهى و البعث راجع راجع
يعني بكره .. أو بعده .. أو بعده .. أو بعد كام ألف سنه ..
هطلع من قبري زي ما كل الناس بتطلع ..
و أمشي في اليوم العظيم بدور عليها ..
نفس الريح القاسيه بس القلب طيب و كبير ..
و أقعد من تاني في الآخر أولع في سجاير و أحلف للناس اللى زيي بالظبط إني مختلف حتى عنهم و الشمس تتسلط عليا نار ما بتهزرش
فأحكي و أحكي عن كل أمجادي اللى طالت القمر ..
و مش هخاف .. هدندن طول ما أنا ناطق بإسم الحق ..
و هخلي الأموات تتطوح من حواليا في دواير العدم
و همه لسه بيسمعوا حكاويا القديمه ..
" كان واحد .. زي الملايكه لكن قلبه تاعبه .. إيه اللى حصل .. ؟ ! "
محدش تاني هيعيط عليا ..
لا المدينه و لا إخواتي و لا أهلى و لا حتى حبيبتي ..
هنام براحتي و أقفل المشهد و أنزل الستاره .. و أحلم ..
فبراير 2005





المره دي في قطر2.5 كل حاجه مش زي زمان
يعني مفيش زحمه و لا ناس بتبيع شاي و لا حتى شباب فرحانه بروحها و عيال غاويه جرّ شكل و عواجيز مش عارفين رايحين فين و جايين منين كل شئ في القطر بارد ببرود روحنا و هادي نفس هدؤنا و سكوتنا
و إحساسي و إحساسك بالعدم ..
كل حاجه بتسمع لك و إنتي بتهمسي عشاني بالنهاية
اللى لسه ماجاتش
و بتعلن موت طفل في بطنك مش موجود ..
كان حلمي ده ولا حلم غيري ..؟! مش عارف ..
المهم إنك دلوقت عرفتي معنى السهر طول الليل و النهار على لمبة أباجوره حمرا في إنتظار كلمه واحده مش ممكن تكون
غير كلمة وداع أخيره ..
بتعلنها كل حاجه فيكي
و إنتي بتخطي برجلك رصيف المحطه بمنتهى الهدوء
و بتمشي ..
ينــــاير 2006



· إرحمونا بقى يا عم ..
هوه ماله المواطن إياه و مال شعار " الإسلام هو الحل " و هوه بيغلط في قراية سورة الفاتحه ..
ما هواش كافر ولا هندي و لا أمه يهوديه مع إن الكفره حافظين نُص القرآن ع الغايب .. الواحد بقى عامل زي نجم البحر مشدود من كل أطرافه ..
جايين بعد 1400 سنه تقولوا إن الخلاص في الحل و الحل عند النجار و النجار بابه مخلع و عينه الشمال مخرومه من كتر الرّف ..
إحنا الأمه اللى هتشهد على باقي الأمم و هتحضر يوم القيامه بقينا لعبة إنتخابات عميا ..
إرحمني يا جلالة الشيخ المبجل – اللى بيغلط في سورة الفاتحه و بينطق نُص الأدان غلط – و المصحف ما هنتخب المرشح بتاعك لحد ما "إنجي محمد عبد الوهاب " تبطل تلبس كت و تخلع البنطلون اللى بتلبسه بالعافيه و تلبس مكانه عبايه زي عباية السيده خديجه ..
و مش هقدر أحط صوتي على صوت مصطفي و إبراهيم و علىّ و همه لسه بيحششوا و بيضربوا مكس في الغرزه إياها..
مش هقدر أحس بنفسي و أربي دقني و أمسك سبحه في إيدي غير لما ربنا يتوب عليا من كل حياتي دي ..
سامحني يا عم الشيخ
بس بعد ما تبطل تغلط في شرع ربنا و تعرف سنة رسوله كويس ..
سبتمبر 2005




· إلعنيني بعرض الكره الأرضيه ..
و إدعي عليا بعدد شعر راسك أو عدد حبات الرمله في الكون
أو عند الكعبه حتى ..
إلعنيني في كل كتاب أنزل أو لسه في اللوح المحفوظ ..
و إفتحي في قبري أبواب جهنم و في نعشي ألف آتون نار ..
و إكرهي كل حاجه بتفكرك بيا ..
الشوارع اللى حضنت فيها كفوفك ..
قصايدي اللى حرقتيها خوفاً من أهلك ..
توكة شعرك اللى علقتهالك بنفسي ..
كل مكان قعدتي فيه فى بيتك و فكرتي فيا ..
إسمي اللى كان سبب عذابك ..
شفايفك البكر اللى محدش لمسها غيري ..
شكلي / هيئتي / هدومي / بيتي / دخان سجايري / صوت أجراس الكنايش الممزوج بصوت الأدان بصوت دعاكي ليا ..
إلعنيني و إكرهي كل ده ..
لو حسيتي في مره إني خونتك
بنيه كامله و منتهى القصد للخيانه .
يوليو 2005

حلم على الخريطه

الليل الشهيد في المدينه بينزف على شط النيل طوفان صور ..
و الخلق الحرانه بتتواعد من غير ميعاد عند كوبري الشرق ..
يا تعب الليل ..
يا خوف العتمه من زحف النور ..
و يا عرق البنات البكر لما بتجري ع الكورنيش زي الرماح ..
بياعين الترمس أكتر م الهم فوق القلب ..
و الحبيبه إغتنوا فزادوا الدنيا وجع لما إتعلموا يسهروا في ( الميراميد ) و يتعشوا ليلاتي في (إخناتون ) العتيق ..
شارع (إبن خصيب ) هيبطل يتكلم بلغة المثقفين و يقفل دراعاته في وش قهوة (المعمل ) لما يبتسم في وش (التكيه )
و الحاج (فؤاد ) صاحب كشري ( النجمه ) هيبص لحال الدنيا و يتعجب من كل حاجه .. م الخواجه نصيف اللى لسه بيحترم الناس اللى بتحب القراية ..
و من صور النائب المشهور اللى بتتقطع ألف مليون مره في الساعه ..
و يحلف للداخل و الطالع إن حتى الساعه قلت بركتها و بقيت نحس ..
من تاني النهارده ..
بتصحى البنات في الفندق اللى جنب الدكان من بعد الغروب ..
و يبعتوا لأكبر صبي في ( سافواي ) طلبيه ع الشاي التقيل و السجاير المور
و همه لسه بيندموا على آخر ولد في الحكاية ..
بيبصوا لبعضيهم من تحت لتحت و يشهدوا إنهم ما بيغلطوش ولا حاجه ..
حتى القواد اللى واقف على باب الفندق عمره ما بيلوم روحه على شئ
لا إبتسامته الصفرا و لا صوته المبحوح ولا لغته الناعمه مع كل الناس
يا تعب الليل ..
و يا حلم على الخريطه بيستشهد في نن عين البشر ..
زي النهارده كان لسه فينا حاجات ما بتتعبش من الترحال ..
زي النهارده ..
هيعدوا الأطفال المحرومين من كل حاجه على كل الناس دي ..
من غير ما يبصوا للنعمه اللى في إيديهم
و يحلفوا إنهم أحسن م الكل ..
حتى و همه بيلحسوا النعال الكحيانه
عشان اللقمه المره ..

يوليو 2006

قصيدة زيف المدن بصوت نيفين الهلالى

إخوانى القراء
من أكتر من أربع سنين كان ليا محاولات مختلفه لمزج الصوت بالموسيقى لتكوين صوره شعريه مسموعه .. بعض الأصدقاء اللى سمعوا محاولاتى دى شهدوا بناجحها و البعض الآخر قال العكس .. لكن الحقيقه إن محدش فيهم سمع محاولاتى بعد التطورات اللى دخلت على الصوت عندى من برامج جديده و أهم تطور هو صوت نيفين الهلالى
ليا الشرف إن كل اللى يسمع يعبر عن رأيه فى المحاوله المره دى بصراحه .. لأن كل رأى هسمعه هيكون ليه تأثير إيجابى على المحاولات الجايه
القصيده إسمها زيف المدن بصوت نيفين الهلالى و من تأليفى و توزيعى .. أتمنى إنها تعجبكم
حملوها من الرابط ده

http://www.4shared.com/file/68596004/dba1ad92/__online.html

البدايه و يارب

هنا .. مجموعه من قصايدى .. ياريت تشاركونى فى همى

تتمرد و نحاول نهرب من جوه التابوت ..
فنشبك صوابعنا و نعلن بتحدى عن ألف سنه من الإستهبال !!!
و نشد رباط الشارع الفاضى بعد نص الليل ..
فيغيب الأسفلت و يتبخر جوانا قمر الطريق ..
يعنى إيه( الغد وافى ) و يعنى إيه (الحاضر ملعون )؟؟؟
كلام أبيض زي ورقة فزوره مفيهاش ألغاز ..
تتمرد فأتمرد على نفسي و أحلم مع شحاتين الطريق بعماره في حىّ غرب عليها أسماء الله التسعه و تسعين و كف مخمس في عين الحسود ..
فيتف علينا الزبال و يلعن أبونا من كتر همه
أهو دلوقت مضطر يا إما يردم علينا يا إما يبلغ عنا المرافق ..
و المشكله في إننا خليناه يحلم و بس ..
تتمرد عليا و تضرب في وشى قصيدة (عرض الحيط ) و تطردنى من منطقة جبروتك (الرصيف)..
فلما أحلف لك إنى هلم عزالى و همشي بعد ما أكمل القصيده دي ..
تحلف برقبة سيدى الفولى ما قاعد فيها و لو ثانيه ..
طب ليه خليتنى أحب الثانيه اللى بتجمعنا و ألعنها أول ما أسيبك ..
فمش هسيبك تكتب عقد عمل مع شحاتين السيده زينب و لا هستنى أنام على رجلك من غير ما تغافلنى
و تشحت عليا في نص الشارع ..
تعرف .. أنا أول مره أشوف في عيونك كل القسوة دي
أول ما تهد دماغى و تكتب على ضهر ديوانى :
" فلسفه فارغه ..
و كلام ما يوكلش عيش فاضى " !!!!
مايو 2008










دانتى الإيطالى قاعد معانا (يشيت) من جهنم ..
عمال يشتغلنا بشعارات حمرا و يكح في الميكروفون من شدة الحر على دماغه ..
أكيد لسه بيحلم بالجنه ..
و ده في حد ذاته عشم إبليس ..
ما هو مش بعد ما يلبسنا زي العفاريت يتحول فجأه لواحد تانى ..
مين اللى قال إنه لازم علينا نكحت الأسفلت تحت كاوتشات (اللامبرجينى ) عشان نعيش
و لو بالعافيه ؟!
و مين اللى خلّى شريعة الكون الجميله تبقى مقلب زباله في نص حىّ (السلخانه ) ؟!
يا بيوت من قزاز ..
ما تحدفيش الناس بالروح ..
لا الأمل منتهى ولا وجع الغلابه صبح للبيع ..
لازم اللى عشمنا بالحلقان تتخرم دماغه ألف مليون مره ..
و دانتى بشخصه و عينه كان مجرم حرب خطير ..
لأنه تاجر بأحلام الفقرا و متعهم بالعالم التانى ساعات ..
خلانى هربت من الأوضه من الطوابير م الهم التقيل و سافرت معاه ..
فلما صحيت ملقيتش غير الشوارع مأوى .. و غير الرصيف لحاف ..
و الوهم هوه طريق المعتوهين ..
أنا واحد تانى بيحلم لسه بغنوة حياه ..
اللعنه على دانتى و كونه الجميل ..
ألف مره ..
قبل ما نفكر نموت .
أبريل 2008















بلاش تسألنى عن اللى ماتوا في عرضك ..
أنا أصلى إمبارح كنت واخد تحت دراعى كتاب الغد و ماشى في أمان الله ..
مش عارف مين كان شعبط في إيديا جيوبه و قال (كبسه )
فالشارع نور و سراين الإنذار إنضربت و قامت هوجه ملهاش زي ..
و الناس طلعت في مظاهرات فى ميدان التحرير تطالب بإستقلال الحشيش عن باقى سلطات الدوله ..
و ساعتها أنا خدت بإيدين اللى جنبى و إتلصمنا في الحيط ..
كان باين علينا السطله و لا الباشمهندس وقفنا في نص الشارع عايز يقيم علينا الحد إفترا ؟!
و تصدق إن وزارة النحاس بعتت برسالة عزا لأهالى ضحايا العباره ..
و برقية تهنئه لصاحبها !
و بسلامته عرابى أفندى زعق و قال : (أنا لازم أكلم جون كينيدى )
فردت (رايس )على عرابي :(هفلطه و شوارع سد )
و الشحات أبو عين واحده إتبسم لورقة جورنال كانت طايره لفوق ...
و بعد الضحكه شاط ع الآخر و زعق بأعلى ما عنده
(اللعـــــــــــــــنــــــــــــــــــه )
طب بس ياعم الشحات اللعنه ليه علينا إحنا و بس ما بتروحش لحد غيرنا ..
و ليه كل ما نطلبها عليهم تترد علينا ؟!
إدينى دراعك و تعالى نشد كمان نفسين ..
و نسند دماغنا على الحيطه و مايهمناش ..
إن الطوب لسه ناشف رغم وعد الحكومه بتنجيده في غرزة (لمعى )
و إن الدعم إتشال من ع الرغيف و إتحط ع الهيروين ..
عرفت ليه أنا كنت عايز أقول لك م الأول :(بلاش تسألنى عن اللى ماتوا ) ؟؟؟!!!
فبراير 2006

الأوله لا و التانيه لا و التالته ألف ميت مليون حياه

بسم الله
كان لازم بعد مرار الرفض فى كل ندوات و نوادى الأدب نرفض .. و نعلن بوضوح .. إننا مش هنعيش للثقافه الزايله .. و هنكتب للنثر .. عشان الناس و عشان المجتمع اللى كل يوم بتزيد أزماته و إنكساراته .. اللعنه على كل من قال إن النثر إرهاصات .. اللعنه على كلم من قال النثر وهم و هينتهى .. أنا هكتب عشان البشر .. عشان المعاناه و ضحايا الحروب فى كل يوم .. نثر العاميه هوه السبيل
أعلنت منهجى ليكم .. و اللى عايز يشاركنى فى وجعى و يمشى السكه معايا .. أهلا بيه .. على راسى .. و اللى هيرفضنى برضك أهلا بيه .. بس ياريته يقول ليه ..

محمد عبد الصبور